МАН-ын эвлэрэлийн ажлын хэсгийнхэн өчигдөр МАН-ын бүлгийг хуралдуулжээ. Тус хурлаар УИХ дахь МАН-ын бүлгийн даргаар Ж.Батжаргалыг, УИХ-ын дэд даргаар Ж.Бат-Эрдэнийг томилохоор болсон. Ингээд талууд тамга, тэмдгээ гардан авлаа. УИХ-ын гишүүн Ж.Батжаргал нь Ерөнхий сайд Г.Занданшатарын тал бол УИХ-ын дэд даргаар томилогдсон Ж.Бат-Эрдэнэ нь УИХ-ын гишүүн Д.Амарбаясгалангийн тал билээ. МАН-ын 68 гишүүн 30, 38-аараа талцаж хуваагдсан.

МАН-ын даргын төлөөх сонгуулийн үйл ажиллагаа ийнхүү МАН-ыг хоёр хэсэг хувааж, эвлэрэх ажлын хэсэг гаргахаас өөр замгүй болгожээ. Эвлэрэлийн ажлын хэсгийг МАН-ын ахмад гишүүд гардан хийж байгаа бөгөөд үүнд Ерөнхий сайдаар ажиллаж байсан болон УИХ-ын даргаар ажиллаж байсан ахмад гишүүд оролцож, залуучуудыг эвлэрүүлэхээр “зүтгэж” буй юм.

Тэгвэл эхний ээлжинд намынхаа бүлгийг Г.Занданшатарын талд, УИХ-ын дэд даргыг Д.Амарбаясгалангийн талд өгч бялуу хуваасан. Одоо МАН-ын их хурал хүртэл УИХ-ын даргыг томилохгүй бөгөөд их хуралд Г.Занданшатар дахин ялагдал хүлээж, Д.Амарбаясгаланг намын даргаар батламжлах уу гэдэг асуудал асуултын тэмдэг болоод байна.