Засгийн газраас Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг УИХ-д өргөн барьсан. Ингээд маргаашийн Эдийн засгийн байнгын хорооны хурлаар хэлэлцэхээр боллоо. Тус хуулийн төслийг өнгөрсөн баасан гаригт УИХ-ын нэгдсэн чуулганаар хэлэлцэхээр дараалалд оруулсан байсан ч УИХ-ын дарга С.Бямбацогт хуулийн төслийг хэлэлцээгүй хассан юм.

Ашигт малтмалын тухай хуулийн төсөлд өөрчлөлт оруулснаар зэсийн АМНАТ-ын 15 хувийг 5 хувь болгож бууруулах гэж байна. Үүнийгээ Аж үйлдвэр, эрдэс баялгийн яамнаас тайлбарлахдаа хөрөнгө оруулагчдыг татах зорилготой гэж ярьж байгаа ч үнэн хэрэгтээ “Рио Тинто” компанид зориулагдаж байгаа юм.

Монгол Улс 2009 онд Оюутолгойн хөрөнгө оруулалтын гэрээг байгуулж, татварын тогтворжуулсан орчноор Оюутолгойн зэсээс энэ олон жилийн хугацаанд дөнгөж 5 хувийн АМНАТ авч байгаа. Харин одоо Ашигт малтмалын тухай хуульд өөрчлөлт оруулснаар Оюутолгойн ашиглах гээд байгаа “Онтрэ”-гийн талбайн олборлолтоос 5 хувийн АМНАТ авах зорилготой буюу гадаадын компанид давуу байдал олгох гэж дээрх хуулийн төслийг УИХ-д өргөн барьсан билээ. Тус хуулийн төслийг баяр наадам далимдуулан батлахаар зэхэж байна.